السلام عليكم
كيييييييفكم ياحلوين وش اخباركم
تصدقون إني أحبكم<<بشري أمك
أقول ماوحشتكم جعلكم البلىآ إللي يبلي أبليسكم<<وش أحس فيه انا
مبرووك للهلاليين فوز الهلال وقسم انهم خطيرين
المهم اليوم قرقرت وبكااامل إرادتي الحره والمتحرره إني اكتب موضوع لأن أدري إنكم اشتقتوا لي<<واثقه الأخت
المهم انا اكتشفت إن عندي أزمه ماديه ومعنويه وعاطفيه وكل أبو شي في اللغه الإنجليزيه
يعني جاااااايبه العيد ورمضان وعيد الأضحى في اللغه الإنجليزيه يعني زييين إني اعرف أكتب إسمي بالإنجليزي<<شاطره
مدري ليه انا بالذات اللي في عائلتنا الموقره اللي مقحصه في هالماده الخايسه المخيسه
بس الحمد لله حتى صديقاتي مقحصات في هالماده زيي<<أمحق صديقات
المهم هذاك اليوم في ماي سكول اند سيستر<<ماقلت لك جايبه العيد في الإنجليزي
كان عندنا حصه إنجليزي وكانت الحصه حصة مراجعه لما سبق دراسته لأن كان عندنا اختبار
وبينما كانت اختكم في الله مسرحه وتلعب في خصلات شعرها المنسدلة على كتفيهاا<<بالله ماكأني روبنزل على غفله
المهم إني كنت مسرحه وفي عالم ثاني قومتني الأبله المصريه الـ طوووووووط<<كلام مشفر
عاد قومتني وسألتي سؤال مادري وشنهو بالضبط لأني اصلا مافهمت شي من اللي قالته
بعد ماخلصت من السؤال قلت لها:هاه؟؟؟<<<<مفهيه الأخت
الأبله:شنو فيك يابنت مابتجاوبي على السؤال<<مصريه وتتكلم سعودي
أنــا:أبله مافهمت شي
الأبله:طيب حعيد لك السؤال تاني @#&^%$*()؟؟؟<<ترا هذا السؤال
انــا قعدت احووس براسي وأدور أي جمله علشان اقولها للأبله ومالقيت
وقلت والله مالي الا صقيقتي الصقوقه اللي جالسه جنبي
وادعس رجولها وانغزها في كتفها<<شكلي كسرت كتفها مسكينه
أنــا:وجع قولي لي اي شي
صقيقتي:قولي لها آآي لاف يو
أنــا:آآآآآآآي لاف يوو
عاد الأبله فوق راسها ميه علامة إستفهام<<انصدمت
الأبله:اووعدي اووعدي دنتي غبيه أوي<<عمى بعينها
أنــا قلت لها تلايطي وجلست شكلها مافهمت وش يعني تلايطي الله يخلف عليها
المهم بعد هالتقحيص جا يوم الأختباااااار يعني جت الطامه الكبرى
طبعا وزعوا الأوراق اول ماشفت الورقه شهقت شقهه زلزلت كل الفصل<<وش احس فيه
المهم إني بغيت أنجلط الورقه كلها بالإنجليزي مااااااااني فاهمه شي
وجلست اكتب إسمي يمكن ساعه كامله
المهم وبينما كنت اختبر والا اسمع صوت احد يناديني من ورا لفيت وشفت صقيقتي الصقوقه وجهها اخضر مزرق
قلت لها بصوت واطي:وجع وش تبين؟؟
صقيقتي:ماني فاهمه شي الحقيني
أنــا:الله يقلعك عاد انا اللي فاهمه شي
صقيقتي:مالت عليك
أنــا:وعليك
المهم بعد ماخلص الأختبار القصير طلعت ورحت عند صقيقاتي ابي اعرف وش إجاباتهم طبعا كلهم جابوا العيد وقحصوا الله يقلعهم
وبالأخير نص الفصل جاب 6 من 10 يعني شكلنا جبنا جيد جدا في الماده <<الله يخلف علينا بس
وهذي هي قصتي مع اللغه الإنجليزيه أسطرها بين أيديكم<<ودكم تقولون لي لا يكثر صح
الفوائد:
(1)اشربوا الحليب يقولون إنه مفيد لأن فيه كالسيوم
(2)ادرسوا جيدا جدا علشان تصيرون شطار
(3)اذا مدرسكم او مدرستكم مصريين اغسلوا إدينكم
وأخيرا وليس آخرا ابي ردوووود+تقييم
وأقوول لكم آآآي لاف يوو
موضوع: اللغه الانقليزيه 
